نعم .. سأتمرد

لم أطلب منك معروف ... و لا أحتاج الاشفاق

و دموع الرقة - أعلم - لن تثنيك ... لأنك فى القوة عملاق

صدقي في حرفي ستعرفه ... لأنني لست من الضعفاء

أتراني أتخبط ؟! ..... معذرة معرفتك جعلتني لا أتنفس الصعداء

كيف أصدق أن ينبض قلبك بالحب و هو خواء!!

ماذا قدمت لروحي غير الحزن و أكوام بكاء !

ستعود تطرق بابي .. تصرخ إني مشتاق

لكن لن أفتح قلبي ... فى وجهك أحكمت الإغلاق .

عقدي..

عقدي من حبات اللؤلؤ ... ناظره دوما يتمتع

ببريق يطفو من روحي ... كشمس شارقة تسطع

يجمعه حبل مجدول ... لا يمكن أبدا أن يُقْطَع

لكن من آثار الزمن ... أجزاء صارت تتقطع

فانفرط بأنات الروح ... صَدِّقْ إن تصمت تسمع

أودعت العقد لدى الصائغ ... و سألته حافظة تمنع

عن كنزي تعرية الزمن ... فإذا بحافظته تتصدع

فأخذت العقد بحسرات ... و عين خائفة تدمع

لحكيم فسألني عن قدم ... ماذا كان اللمالك يصنع ؟

هل كان يداوي ما يُقْطَع ... أم كان بالعُقَدِ يُجَمِّع ؟

حبلك مجدول سيدتي ... على عُقَدٍ إن باتت تصدع

قد قصر بها الحبل و صار ... على عنقك يخنق لا يلمع

و انطفأت روحك و نسيت ... لقد كانت لبريقه مرجع

بثي منها حياة لكما ... لا تتركيها تتمنع

عودي للصائغ قولي ... بعزيمة لا تتزعزع

لن أرضى من اليوم ل عِقْدِي ... من وقتك جزء مستقطع

و استبدل حبلي بسلسلة ... من ذهب أبدا لا يرقع

سأعيد روحي تسري فيها ... فانظر و اعقل كيف ستصنع !

أمامك من الوقت قليل ... و احذر فالماضي لا يرجع

سنه اولى شغل :(

كنا واقفين البوست الى فات اننا اخر سنه كليه والواحد مش عارف هيعمل ايه بعد ما يتخرج واحساس رهيب بالتوهااان
المهم كل واحده فينا بعد ما اتخرجنا خدت هدنه مع نفسها
بريك اتجوزت و كهرمانه مسكت مشروع محو الاميه وسخسوختى خدت بريك م الكليه وانا روحت حجيت وغيرت جو ف السعوديه

وجه بقى وقت الجد ..

الشغل :S

الدكتوره ظوظو الحمد لله قدرت تشتغل ف صيدليه وقبضت اول مرتب كاى دكتور صيدلى محترم ..رافعه راس الجروب دايما والله يا ظوظو
البشمهندسه كهرمانه ايوووووه بشمهندسه لانها الوحيده الى قدرت متفكرش حتى ف كيونينه انها دكتوره ولا ان المفروض تنزل تشوف اكل عيشها
انا وبريك :بعد احساس رهيييب بتأنيب الضمير وعدم المسئوليه ناحيه الشهاده الى الكليه اتبرعت لنا بيها قررنا ننزل نشتغل ف صيدليه بمرتب صيدلى واحد ..احنا اكبر من الماديات دى المهم نبقى سوا ..كلمتين من عندى على كلمتين من عندها يمكن نعرف نعمل حاجه

روحنا للدكتور ف لقاء الاتفاق
احمممممممممممممممممممممممم
احنا : دكتور احنا عايزين نشتغل مع بعض وممكن نشتغل بمرتب صيدلى واحد عادى يعنى الماديات مش هتفرق
الدكتور :( ضحكه على خفيف )مفيش مشاكل ..اشتغلتوا ف صيدليات قبل كده
احنا : لا دى اول مره
الدكتور :و نزلتوا تدربوا فين بقى
بريك : انا نزلت وقفت ف جمعيه صناع الحياه قبل كده و لوزا نزلت اتدربت اسبوعين
الدكتور : بتعرفوا تقروا روشتات بقى
انا : حسب الدوا الى شوفته قبل كده ممكن اقراه والى مشفتوش مش عارفه لسه
الدكتور :( نظره يأس ) طيب تمام ..تحبوا تيجوا الساعه كام 8 ولا خلوها 9
احنا : احممممم دكتور احنا مبنديش حقن
بريك : احنا عارفين نديها ازاى بس مش بنقدر ندى حقن
الدكتور : متقلقوش هعلمكم
بريك: هى مش اننا مش عارفين بس احنا بنخاف ندى حقن
الدكتور: لا ان شاء الله واحده واحده وهتدربوا تحبوا تيجوا من امتى

احنا : ان شاء الله من التلات الى جاى




التلااااات واول يوووم شغل
بدأناها نشاط وجبنا الروشتات القديمه الى عند الدكتور وقرينا كل الى جربنا نقراه تقريبا وطلعنا الادويه من مكانها كانه شغل عادى وبعد كده رجعناها والدكتور استغرب ان اول مره نقرا روشتات والحمد لله عرفنا نطلع الادويه كلها

وبعد كده قعدنا نستنى زباااين وكل شويه حد يدخل نفرح ونقوم بقى هنستفتح يطلع الدوا ناقص ف السوق اصلا نرجع نقعد محبطين
لحد ما استفتحنا على بامبرز فرط مقاس 3
وحاله ملل تعم الاجواء

وفجأه الضهر ادن ..!!!!

وانا وبريك زى ما يكون جالنا الفرج
استأذنا الدكتور نروح نصلى وطلعنا نجرى من الصيدليه زى العيال الى بتزوغ من حصه ف المدرسه
صلينا واتمشينا شويه لحد سوبر ماركت تبضعنا... ورجعنا :((

شويه ودخل واحد بيقول خلع درسه ولسه متحمسه بقى انه هيسال على دوا ونشتغل OTC
لقيته بيقول ف شفافيه قشفت وعايز لها حاجه ..فجبنا له زبده كاكاو :S

وفين وفين بقى دخلت لنا جروب بناات طالع من المدرسه ونفس الفرحه الى بعشم الى بتجينا مع كل حد يدخل الصيدليه
طلع فيهم واحده ضافرها اتكسر وبتقولى ممكن تقصيهولى :S
قولت لها مش فاهمه يعنى انتى عايزه قصافه ولا عايزه ايه
قالت لى لا انا عايزاكى تقصيهولى عشان خايفه يدخل على اللحم
جرررررررررررررررررررررررررررررررررررررررررررررررررررررررررررررر
لا انتى تروحى تقصيه عادى وان شاء الله مش هيحصلك حاجه

وخلص الشفت بتاعنا كده وروحنا



وبعد تانى يوم قررنا انا وسمر نسيب الشغل بس عشان ميبقاش شكلنا عيال قدام الدكتور هنكمل معاه اسبوع ونجيب حد تانى مكانا

زلطه ونطلع بره ..

كل ما افكر ان احنا خلاص فاضلنا الترم ده ونتخرج بفرح اننا خلاص مش هنذاكر تانى بس بتخض جداااااااا ..
عارفين يعنى ايه نتخرج..!! انا الصراحه مش فهماها لحد دلوقتى ..
يعنى ايه ابقى كبيره كده ومسئوله ..!!
انا عشت طول عمرى اكبر مسئوليه عندى انى اذاكر ماده ليله امتحانها وانجح فيها ..
طب لما اتخرج هعمل ايه ..!!!
السؤال ده بالذات بخاف افكر فيه ..
كل ما اجى افكر فيه الاقي شريط الكليه بيعدى قدام عينى من اول اعدادى لرابعه بالذات الامتحانات ..

اعدادى ..
مش هتكلم كتير عن امتحانتها لانها كانت عاااااار بكل ما تعنيه الكلمه ..
كفايه اننا كنا بندخل امتحانات الاورل برقم الجلوس وعناوين الشابتر الى احنا مذاكرينها الى غالبا مبتزيدش عن تلت الماده :s
ولا النطق ..كنا اساتذه ..انا فاكره انى دخلت مره لدكتور بيسالنى الزهره دى نوعها ايه قولت له كونكشيسيسنس (كونسيه يعنى )..والراجل يقولى ايه وانا اعيد نفس النطق الى متعرفش تكرره مرتين زى بعض وده طبعا عشان كنت بلقط اول 3 حروف م الكلمه واكمل الباقى من الابجديه الانجليزيه حسب ما تيجى معايا..

اولى
كنا لازم ننزل ف معاد المحاضرات ويمكن كانت اكتر سنه نزلنا فيه الكليه..
السنه دى كنا بنروح مع دفعتنا ونرجع مع دفعتنا ف المواصلات بس الفرق اننا اول ما ننزل.. احنا نروح نقعد على الرصيف تحت الكوبرىوالدفعه تطلع على المحاضرات وكانت بتوصل بينا ساعات اننا نبقى قاعدين فالكليه والسكاشن بتاعتنا شغاله فوق ومحدش راضى يطلع..القاعده الحلوه متتعوضش :D

تانيه
بدايه الكورسات وقعدتنا قلت ف الكليه .. كل 2 عند دكتور غير التانى و كل واحد بقى عنده حاجه ينزل يشوف وراه ايه لو موراهوش يقعد ف بيتهم ..
ايامها كنت بروح الكليه انا والهاند فرى ..
تصحى الصبح تبدأ يومك الساعه 8ونص سكاشن وكالمعتاد اول ما اوصل اول شارعنا افتكر البالطو ارجع ارن الجرس تلقائى يطلع حد يحدفهولى م البلاكونه ..اخلص سكاشن اشوف هند فين ف الحوار وانطلق انا وهى على الكورس

تالته حيث الابداااااع
الى ميعرفش تالته صيدله فاحب اقوله انها حاجه كده زى الجيش بس مفيهاش اعفا
الحمد لله اننا خرجنا منها على رجلينا ..
تالته دى بقى كانت كورسات وسكاشن ..ننزل الصبح عندنا كورس وسيكشنيين ف نفس الوقت
2 يروحوا سكشن و3 يروحوا سكشن وكل جروب ياخد غياب الجروب التانى ف السكشن الى هو حاضره
ونتقابل بعد السكاشن عشان نطلع على الكورس كنا بنروح من طنطا على 5ونص كده عشان يا دوب نلحق نحضر كورس ف شبين الساعه 7

امتحانات 3 بقى كنت بتدخل الامتحان وف دماغك حاجتين
1-هتحل يعنى هتحل حتى لو جزء مفتحتوش ويا قاتل يا مقتول
2- لو ربنا كاتب لك انك تشيل ماده هتشيلها حتى لو كنت فاحتها كلها (ودى غالبا محصلتش معاك على مدى ال3 سنين الى فاتوا فمتتوقعش انها تحصل معاك السنه دى) ولو ربنا كاتب لك تنجح نضيف هتنجح لو مفتحتهاش ربك كريم فسيبها على الله

ندخل على امتحان التشريعات مثلا :
س1:اكتشفت برديه مش عارف ايه عام
أ-1954
ب-1969
ج-1956
د-1952
(احنا فينا من تواريخ ..!!! امممممممم د.عصمت الى حاطط الامتحان ده.. يبقى استبعدى 60 عشان مفيش غيرها الى ف الستينات وهو اكيد عايز يلخبطنا ..طيب ما دام هو عايز يلخبطنا يبقى اكيد هيجيب رقم اعلى ورقم اقل من الرقم الصح عشان شويه يتلخبطوا ف الرقم الاعلى وشويه يتلخبطوا ف الرقم الاقل يبقى ان شاء الله هتبقى 1954) ..بعد الامتحان عرفت ان الاجابه زى ما حليتها الحمد لله ..

س2:لو صيدلى مارس المهنه من غير رخصه
أ- سجن سنتين
ب- غرامه ماليه مش فاكره كام
ج- تحويله للتحقيق امام لجنه مكونه من مش عارف كام

(اسجنه سنتين ..!! حرااام ..انا ادفعه غرامه وخلاص )..

س3:رخصه الصيدليه لازم تاخد توقيع
أ- وزير الصحه و نقيب الصيادله و2 وكلاء وزاره
ب- نقيب الصيادله ووكيل وزاره و 2موظفين صحه
ج-نقيب صيادله و 2موظفين صحه ووكيل القابه

(هو الوزير فاضيلهم وبعدين ما دام كرر النقيب كده يبقى اكيد كده كده النقيب معانا وعايز يلخبطنا ف الى بعدها الاحتمالات دلوقتى يا التانيهالتالته شكلها كده التانيه ان شاء الله)

وده طبعا دليل انى حريقه حريقه يعنى

نيجى بقى لامتحان الاورل بتاع نفس الماده
الدكتور : ارتفاع الصيدليه قد ايه ؟
الى جمبى : معرفش
الدكتور : لما تروحى تشترى مكان لصيدليه ب 300 الف ج ويترفض التصريح بتاعها عشان الارتفاع هتروح عليكى الفلوس عشان متعرفيش.. ولا ايه..!!
الدكتورسالنى نفس الؤال
انا: قبل ما اروح اشترى الصيدليه هعمل سيرش على النت يطلع لى ارتفاعها
مش بقولكم حريقه :p

رابعه
مش عارفه ليه مش فاكره الترم الى فات خااالص :s
الترم ده فاحنا الحمد لله بننزل يومين كل اسبوعين يعنى تقريبا 4 مرات ف الشهر :s

حدووووتة

بداية الحدوتة كانت مضحكة..اول سنة لينا فى الكلية و انا و بريك قاعدين على الارض ايام ماكنا مش بنلاقى كنبة فى الكلية نقعد عليها..فجأة لقينا ولد اسمر و حليوة جاى مع صاحبه بيكلمنا"انا اسلام الامين..طالب معاكم و فى الاتحاد..كنا حابين نبلغ حضرتك ان فيه رحلة لدريم مطلعنها من شبين مخصوص و ياريت تشتركوا فيها"..طبعا هو قال حضرتك و انا ابتسمت..و طبعا انا ابتسمت و هو اتحرج و ودانه احمرت..و قلناله"اكيد بس هنقول لبقية اصحابنا"..و عدى الموقف..و ماكنش هينفع نطلع فيها مش فاكرة ليه..و اللى اكتشفته بعدها ان لا فيه رحلة ولا يحزنون و انه كان مش عارف يفتح كلام فاخترع الحجة دى بعد تفكير اسبوعين..و انه فضل اليوم ده ماشى ورانا انا وبريك ساعتين مستنى الفرصة المناسبة..و مرة فى مرة و كلمة فى كلمة .. و كل كلمة تبين اد ايه هو محترم و اد ايه هو بيتحرج بسهولة.. و طبعا بدأت العصابة السوسة تاخد بالها.."ظوظو ده مش بيشيل عينه من عليكى..ظوظو ده حتى و انتى مش بصة بيفضل متابعك" و ظوظو اللى هى انا بتقولهم"لا عادى..بطلوا نقورة على الناس..هو بس عشان انا اكتر واحدة فيكم ليها كلام معاه..لا ده محترم و بيتحرج" و الغريب انى كنت بموت فى احراجه ده..و فى مرة كان هو محتاج ورق مادة معينة و كنا فى الامتحانات و كان هيجيلى متأخر و هو فضل يحاول فى الكلام انه يوصلنى انى ما اداميش حل غير انى اديله نمرة تليفونى..قمت انا اتناصحت و قلتله طب هات نمرتك و انا لما يجيلى الورق هسيبهولك فى المكتبة الفلانيه و اعرفك :) ..و بكده بقى معايا نمرته.. وفى تانى سنة جيه عيد ميلادى ..و قررنا نعمله فى الكلية..و عملنا التورت و قلنا هنعزم مين..كنا عازمين ناس كتيير منهم كان اسلام و واحد صاحبه و اتنين تانيين كنا نعرفهم كلنا..و قصدت ماقلش لحد عشان محدش يجيب هدايا..و هو قلتله قبلها بيوم عشان اضمن انه جاى و نبهت عليه محدش هيجيب هدايا..و طبعا كان هو الوحيد اللى فاجئنى بهدية..كانت عروسة جمييلة اوى..سمتها حبيبة لان كان الاسم ده ساعتها عاجبنى اوى و مقررة اسمى بنتى على الاسم ده..لحد دلوقتى بتنام فى حضنى..احلى حاجة انه اول ما جيه الولدين التانيين عيد ميلادى خدت بالى انه اتنرفز..و ضحكت فى سرى..بعدها بكام شهر كان جيه الفالنتين و قررنا انا و بريك و سنفورة نلبس اى حاجة فيها لون اورانج و قررنا ان ده لون اللى مش مرتبطين :)..و لقيته بيتصل بيا انا عاوزك ضرورى انتى فى سكشن ولا فاضية..اد ايه كان صوته متوتر.. نزلت شفته فين فى الكليه و لقيته بيطلعلى هدية..طبعا انا اتحرجت..كنت طالعة من ظروف مخليانى مقررة انى الغى الحب من حياتى..و انى مستناش حاجة من الدنيا..اد ما كنت معجبة بيه اد ما رفضت الهدية و انا مش باخد هدايا و هو يقولى انا بس برد جمايلك فى اقرب مناسبة جت و انا اقوله خليها فى عيد ميلادى و كلمة هنا كلمة هنا انتهى اكتر موقف محرج بالنسبالى..و مشيت منه و انا مش عارفة سر اصرارى على الرفض ده..و انا حسة بالغباء من اللى عملته..قعدنا فترة بعدها يتجنب انى اشوفه و قعدت انا فترة احاول انى اشوفه.. كانت ايام بايخة..بعدها بفترة كنت قاعدة على ايميل البلوج..و لقيته اونلاين..اكلمه و لا لأ..بعدها عرفت انه كان قاعد قبلها بساعة يسأل نفس السؤال..كلمته من غير ما يعرف انا مين فى الستة..و اصر انه يعرف فعرفته..يومها سبحان الله قعدنا نتكلم كتييييييييير اوى..كان يوم جميل..و تانى يوم اتقابلنا فى الكليه و قعدنا نتكلم كتيييير برضه اوى..اكتشفت اد ايه هو حد جمييل .. طيب و محترم و حنين.. بعدها ورانى حاجة كان هو كاتبها..حاجة عن واحدة كان بيحبها.. طبعا كان الكلام عليا..مش عالافة جاتلى الجرأة ازاى اسأله اذا كان لسه بيحبها.. انا مش فاكرة ازاى سألت السؤال بس سألته بطريقة تلخبط فهو اتلخبط و قالى لأ..انا اتكبست طبعا و وشى جاب الوان..فجأة هو عاد السؤال فى دماغه و لقيته فجأة بصوت عالى يقولى "لأ أأأأأأه اكيد لسه" انا ساعتها ضحكت اوى..احساس غرييب بالراحة..و مشينا.. كتبت موضوع هنا على البلوج..انى خايفه لانى فرحانة..و انى كل ما بفرح بتيجى بعدها حاجة تانيه وحشة..و كتبلى رد كان بالفطرة..و خاف ماكنش قريته فطبعهولى و اداهونى فى الكليه..قلى اسمعى نصيحة مجرب و صلى استخارة..بعدها عرفت انه كان صلى استخارة قبل ما اكلمه على الايميل بليلة واحدة(لحد دلوقتى شايلة الورقة اللى طبعلى فيها الرد ده)..صليت استخارة..و سألنى اذا كنت جربت نصيحته..بعدها قلتله انه لازم الموضوع يجيى رسمى..طلب منى بس انى استناه و و انه اللى مانعه ظرف معين لو اتحل مش هيتأخر و احترمت الظرف ده جدا و احترمته هو اكتر..و كملنا مع بعض.. معرفة البيت عندى و هو معرف البيت عنده..و استحملنا كتييير اوى..انا بطبعى بعمل اللى مقتنعة بيه حتى لو مش عاجب الناس..اد ايه هو كان سندى فى الدنيا..اد ايه فضل هو فرحتى .. اد ايه فى اسوأ الظروف وقف جنبى استحملنى..اد ايه فى اكتر الايام اللى كنت بكتئب فيها كان هو الوحيد اللى بيعرف يسرق منى ضحكة وسط عياطى..اد ايه وجوده اصبح لازم فى حياتى..مبعرفش اصحى من النوم غير لما بسمع صوته..و مبعرفش انام غير برضه لما اسمع صوته..عمرى فى حياتى ما كنت بعتمد على حد..الا بعد ماعرفته..مابقتش اعرف اعمل حاجة غير بمساعدته.. على اد علاقتى بيه على اد ما كان اخ لباقى الستة..حتى باقى العيال وقفوا معايا فى قرارى و كانوا سند ليا فيه..و هو فجأة بأه له هدف فى الكلية بأه يذاكر عشان يجيب تقدير و الغريب ان الناس فهمت انى انا اللى كنت بشجعه..و ما يعرفوش ان وجوده هو اللى كان بيشجعنى..هو اللى بيعملنا جدول مذاكرة..و هو اللى بيزعقلى لما بقصر فيه..هو اللى بيراجع معايا على التليفون..و انا اول واحدة يطمن عليها بعد الامتحانات.. بجد هو صاحبى و والدى و اخويا و سندى و حبيبى.. و ابنى كمان..ساعات بجد بحس انه ابنى..كل ما بكتشف نقطة ضعف ليه كل ما حبى بيزيد ليه مش عارفة ازاى..و هو كمان بأة بيقلد بصوته طفل صغير و بأينا نتخيله ابننا..ياربىىىىىىىى اد ايه مستنيه يجى اليوم اللى اشوف فيه ابنى و يطلع بيتكلم بنفس الطعامة دى.. اد ايه كنت فى عز حزنى لو سمعت الصوت ده كنت بطلع من الحزن ده..و اعمل حوار طجويل معاه و انسى و اتخيل انه ابنى فعلا

و فجأة ربنا من كرمه و حنيته فك الظرف اللى كنا مستنينه ده..يااااه..فجأة لقيت تليفونا بيرن..تانى يوم لقيته عندنا فى البيت..و فى نفس اليوم قرينا الفاتحة و قرروا ان هنلبس الدبل اخر الاسبوع و نأجل الشبكة لبعد الامتحانات..انا مكنتش مصدقة..ايه ده اد كده ما ضاقت الا لما فرجت..قررت اعملها مفاجئة للعيال و عرفت نونو عشان تساعدنى فى المفاجأة .. وقبل الدبل بيومين حصلت حالة وفاة ..جد لوزة ربنا يتقبله فى جناته ان شاء الله..و لوزة سافرت.. طبعا ماكنش ينفع احتفل من غير لوزة ..لازم الستة يكونوا معايا..و ماكنش ينفع أأجل الميعاد بعد ما ارتبطنا بيه .. و فضلت ليلة الخميس مش جايلى نوم للفجر..و فجأة بعت مسج للوزة قلتلها الخبر..طبعا طارت من الفرحة و قالتلى ماتحمليش هم انا هجيلك يومها ان شاء الله.. اكلم ياسمين "ياسمين انتى فاضية بكره؟" الاقيها بتقولى بكره ما ينفعش خالص جايلنا ناس مهمين" ييييادىىىى النيله..بصى يا ياسمين انا من الاخر هلبس الدبل بكره انا و اسلام و يخرب بيت اللى يفكر يعملكم مفاجأة" طبعا برضه طاارت من الفرحة و قالت لأ هجيلك ان شاء الله ساعة و امشى على معاد الناس مش معقول هتلبسيها من غيرى..و الحمد لله عرفت افرح احلى و اكبر فرحة فى حياتى فى وجود اهم ناس فى حياتى..انا بجد مبسووووطة جدأ جدا جدا..و الى حد ما مش مصدقة.. ومقدرش اقول غير الحمد لله يارب و ربنا يخليكوا ليا يا عيال..و بحبك يا اسلام :)

النهاردة

مساء الخيير عليكم ..ازيك يا عم ابراهيم اخبار الشبك معاك ايه النهاردة؟..مساء الفل يا حاج محموووود اتفضااال..لا و الله ماصطدناش حاجة النهاردة الحال واقف بس عشاك عندنا مع احلى كوباية شاى طبعا..هه..خلاص سلمت على جيران المركب و ضبطت القعدة و جيت ارغى شوية..ارغى عن ايه..همممممم..هحكى النهاردة بما انه كان بالنسبالى يوم طويييييييل..النهاردة صحيت الساعة 8 الا ربع كده و فضلت أأجل المنبه لحد 8 و قايمة غصب من عنى و انا مستغربة هما ازاى لوزة و بريك و كهرمانة بيلاقوا صحة يصحوا الساعة سبعة الا ربع عشان يحضروا محاضرة من قبيل التغيير الترم ده..و قمت و قفت قدام الدولاب طبعا فى الوقفة الصامتة اليومية اللى بقفها بلا اى حركة قدام الدولاب لحد ما فجأة امد ايدى اطلع الهدوم اللى مناسبة مزاجى..و بعد اللبس و الصلاة و الذى منه نزلت على الموقف و انا مرتبة فى دماغى ان النهاردة هحضر انا الكورس بدرى و اقابل لوزة و كهرمانة و بريك بعد ما يكونوا طلعوا من المحاضرة و نونو تجيلنا على طنطا و نخرج نتفسح او ناكل و ال 3 اساتذة يروحوا الكورس هما فى الميعاد المتأخر و اورح انا و نونو..وصلت طنطا..عديت على جاد اتعزمت على الفطار و طلعت على الكورس ببص لقيت لوزة و بريك داخلين عليا كل واحدة ماسكالى عصير برتقان.."ايه اللى طلعكوا من المحاضرة!!!" فيردوا الرد اللى انا متوقعاه من امبارح"اصل احنا وصلنا متأخر فقررنا منحضرش و نفطر من جاد"..طب فين كهرمانة؟؟.."لا هى ماكلمتناش قلنا يبقى هتنزل متأخر معاكى" و الاقى موبايلى بيرن الانسة كهرمانة:ايوة يا ظوظو انتى فين ؟؟.."انا داخلة على الكورس".."طيب ايه نظام الخروج؟؟"..عادى زى ما هو اتفقى بس مع نونو و تعالوا مع بعض""خلاص اوك"..و ساعتها تقرر الانستين التانيين انهم يستنوا كهرمانة و يحضروا معاها الكورس فى المعاد المتأخر..حضرت الكورس..و نزلت ادور عليهم.."انتوا فين""احنا فى المحاضرة خمسة و هتخلص" يادى النيلة على الالتزام اللى مقطع نفسه فى اخر شهر فى ال5 سنين..نزلولى من هنا و خلاص نونو و كهرورة على وصول لقينا صوت عالى و هوجة و فيه اعتصام فى المدرج.."هييييييه يلا نروح نتفرج" طبعا الجملة دى مش متأ:دة مين الى قالتها فينا بس مش بعيد نكون قلناها مع بعض ..طلعنا..لقينا الموضوع قالب بخناق اكتر من انه اعتصام صيادلة..طيب هى ايه المطالب..مش عارفين بالضبط..طيب ماهو فيه اجتماع مع العميد بكره ايه لزومه الكلام ده..لأ لازم ينزل يكلمنا دلوقتى..ودكاترة تنزل و دكاترة تيجى و ماحدش سامع حاجة من حد..نونو و كهرمانة وصلوا و هم لسه بيتخانقوا مع بعض..لواء الجيش جيه و قال كلام معقول فعلا و طلب يسمع المطالب من حد..و نلاقى خمسين حد قام..طب واحد واحد..كل واحد يعيد كلام اللى قبله..كان حوار مستفز ضيع الوقت و خلاص معاد الكورس بتاع العيال قرّب و مش هنلحق نخرج..و كالعادة بما ان واحدة حضرت الحصة الباقى يبصلها فجأة..و بالتالى اعرف انه مافيش حضور و انى هشرحهالهم بعدين..و تعظيم سلام على الالتزام..طيب نروح فين؟؟..محل السمك اللى اخو نونو (او أبيه زى ما نونو بتقوله) اكلهم فيه..و تاكسى و هوب على المحل..و الصراحة كانت غدوة حلوة..و خلاص الوقت اتأخر فيلا بينا نروح شبين نكمل الخروجة هناك..و طلعنا الموقف وروحنا فى عربية حقيرة سقفها طابق على نفسك بس نحمده..نزلنا سفارى كالمعتاد..شاى بأه و قهوى و ميلك شيك وضبطنا..نزلنا انا و نونو نجيب حاجة فى دقيقتين و طلعنالهم تانى لقيت بريك بصالنا بتحفز ..عرفت اللى فيها..دلوقتى هتقولنا على فكرة حاجة نعملها يا اما محتاجة فلوس يا اما مجهود يا اما الاتنين.."ادّينى فى الوريد يا سمر".."احنا قررنا نعمل حوار الحفلة اللى كنا بنفكر فيه بقالنا سنتين" و مطلعة ورقة و قلمة يعنى فيها خطوات و مهام ومسئوليات ..ادّيينى...و طبعا بدأنا نفكر عاوزين نعمل ايه بالضبط فى الحفلة و نضبطه ازاى و كل ده..(مش هقول الحفلة عن ايه .. هسيبها مفاجأة و كده كده هحكى عنها لما تتعمل ان شاء الله).. و بما انى مفلسة اليومين دول فأى كلام على فلوس تدفع بيجيبلى ارتكاريا..المهم خلصنا المشاريب و قمنا عشان نروح..و بعد ما ركبنا بريك و لوزة تاكسى قررنا انا و نونو نتمشى (شوية)..و طبعا (شوية) دى فضلت تمط .. لفينا شبين مشى _جبت نضارة نظر صحييييح و طبعا قرفت الراجل صاحب المحل و هو يا عينى فاهم انى مش عاجبانى الحاجة اللى فى المحل و مش فاهم انى اصلا بكره البس نضارة نظر ايا كان شكلها_و اتفرجنا على هدوم لانى نفسى اشتر طقم بناتى اليومين دول..لحد ما وصلنا بيتى اللى فى اخر شبين و ركبت نونو تاكسى عشان تروح بيتها بأه..كان يوم تغيير الصراحة بس من نتايجه السيئة انى لقيت بالونة فى كل قدم..ادى اخرة الجزمة البوت و سلملى على الشياكة...هه دنيا..ايه ده؟؟هو مين اللى كان فك المركب؟؟ انا فى نص الميه مش شايفة عمااار حواليا..يخرب بيت الرغى..شكلى هقضّى نص الليل بجدّف لحد ما ارجع..فكرونى اجيب موتور للمركب ده و نقلبه لانش اسهل من التعب ده..تصبحوا على خير انتوا و ادعولى عشان انا مبعرفش اعوم اصلا :'(

عادى..فجأة قعدت اقرا البلوج بتاعنا اللى بكل غباء هجرناه بقالنا اكتر من سنة..فجأة مبقتش فاهمة احنا ليه سبناه..يمكن عشان مشاغل الدنيا..بس هى طول عمرها مليانة مشاغل..انا رأيى ان احنا سبناه عشان الروتين..عشان كنا وصلنا لمرحلة كان فيها الكتابة فى البلوج واجب بعد ما كان للمتعة..عموما ايا كان السبب فهو متخلف..عموما بما انى بفضفض هنا لوحدى و متأكدة ان ماحدش بيقرا فانا هقول اخر اخبارنا دلوقتى..همممممم..بالنسبة لمصر فكل الناس عارفة اللى بيحصل فيها دلوقتى بعد الثورة و عارفة محاولات الخروج من ازمات كتير و ربنا يستر بس انا تعبت من السياسة فمش هتكلم فيها..

هممممم ... نبتدى ب(بريك) بريك عقبال عندكم خلاص فاضلها كام شهر و تروح لبيت العدل"مش عارفة يعنى ايه العدل الصراحة" و اليومين دول مشغولة بتخليص باقى حاجات الشقة و السيراميك و ما الى ذلك..و احنا اصلا مش متخيلين انها كام شهر و تبقى عروسة..دى لسة عيلة

اما عن (لوزة) فلوزة بقالها فترة يا عينى واقعة فى مشاوير العرايس بين اختها شوشو و صاحبتها يارا..و مقررة تستمتع بالترم ده بما انه

اخر ترم فى الكلية فبتنزل كل الايام و على المحاضرات..و تتمشى مع اى حد لو احنا مش موجودين..و كمان بتتصور معاهم مع انها لسة متعرفة عليهم

نيجى ل(كهرمانة).. و هى كالعادة على طول مشغولة..فى ايه بالضبط..انا معرفش..لكن ما بين الجمعية و حوارات تانية كتيرة..بس ربنا

يسهل و نسمع عنها خبر حلو قريب..(هشششش..ماحدش يقولها انى سيحت عشان ما تاكلنيش)

اما عن (نونو)..فالانسة خلاص بأت خريجة مش طالبة زى حالتنا و كعادتها بتستمع بحياتها و الاوقات القليلة اللى بتبقى فيها فى شبين بتعرف تخلينا كلنا نستمتع معاها..بتاخد كورس انجليزى و بتدور على شغل تستحمله اكتر من اسبوع

بس خلاص دى كانت اخر اخبارنا..ايه؟؟..اخبارى فين؟؟..لا جديد تحت الشمس..

بس يمكن الخبر انى قررت ارجع اكتب و انا فى مركبنا العزيز..بس فى السكرتة

كبرنا

احنا بدأنا البلوج ده من مايو 2007 يعنى من تلات سنين كده (عديتهم على صوابعى)..التلات سنين دول غيرووونا كتييير اوى..حسه ان احنا عجزنا فيهم..زمان كنا ننزل الكلية اول كل سنة و احنا مقررين نحضر محاضرة على الاقل من كل مادة و نشوف ليها لزمة ولا لأ..و بعدين نرسى على محاضرة واحدة و بقية الوقت نقضيه تحت الكوبرى فى الكليه..نهيس..نرغى..نلعب سبن ذا بوتل..نعلق على لبس اى حد معدّى"الشوذة دى مش لايقة..الطقم ده جامد..الطرحة دى مش مكانها..الشنطة دى بوّظت الطقم" ممكن نقضى ساعتين كده..و اللّى وراه فينا سكشن يطلع و الباقى مستنيه تحت فى مكانه..نروح سينما كل ما فيلم ينزل..نقعد فى الكشك بتاع الكلية نشغل فيروز لحد ما ننسى احنا فين و امتى..نرغى كتييييير و نتجادل اكتر..نعلى صوتنا فى العربيات و مش واخدين فى بالنا لحد ما حد يقولنا صلوا عالنبى..مانساش يوم ما سواق طماع ركبنا خمسات فى الكنبة..و حبينا نبوخ عليه فكل واحدة فينا سدت ودنها و بدأت تغنى بصوت عااالى اغنيه غير التانيه..كل مافتكر الموقف ده بحسنا مستفزين جدا جدا جدا..كنا هبل اوى و صغيرين اوى..كنا نعمل اللى شايفينه صح حتى لو كل الناس قالولنا غلط..عرفنا ناس..اعجبنا بناس..وكرهنا ناس..واتلسعنا من ناس و ناس وناس..غلطنا كتييير غلطات نفسى الزمن يرجع عشان مانعديش بيها تانى..وفجأة لقيتنا كبرنا..حسة بحالة من الخرس فى حياتنا..بقينا كل واحدة مشغولة بدنيا..لسه اصحاب و اخوات..بس عاقليييين..انا فاكرة مرة زمان كنا راجعين شبين و الجو كان جميل و هوا شباك العربيه مخدر وشوشنا..وقررنا نرجع فى نفس العربية طنطا عشان نفضل فى المود ده شوية كمان..آخر مرة عملنا حركة مجنونة او ملهاش معنى زى دى مافتكرهاش..حتى فى خناقتنا بقينا نكبّر .. انا نفسى حسه انى عجزت من جوا..كل حركة بعملها الف حساب...عارفين زمان لما كنت انزل دريم بارك ماكنش فيه لعبة الا لما اركبها..مع الوقت بأيت اجبن..كل مرة اخاف ادخل لعبة جديدة لحد ما بطلت اروحها..حاسه انى يائسه..كل اللى نفسى فيه بيبعد يوم عن اللى قبله لحد ما بقالوش طعم..حسه بجبل تلج بيشل قلبى بيمنعه من جنونه بيوقف نبضاته بيسد نفسه يوم بعد يوم..احنا امتى كبرنا كده..و ليه كبرنا كده؟

شفته من بعيد

بعتم الليالي وحدي لحالي
وما حدى طل من قبالي
ايدوو مالي عل الهدى

شفته من بعيد , ماشي وحيد
صار بعينيه يعطي مواعيد
وبسمه على شفاف
قالت له وقاف
حدك مشيني
والأيد بالأيد

سوا تمشينا
ونظرة عينينا
ملبكه
شو حكوا علينا
ولا اهتمينا بالحكي

سرنا على الدرب
ونتوديغرب
صار يغازلني
ويحكي بالحب
قالي دلوعه
قلتله اوعى
وصارت مسموعه
دقات القلب

(اغنية ليارا عجبتنى اوى)
http://www.youtube.com/watch?v=cRQi1AMRGxE&feature=related

"بيدى لا بيد عمرو"

عارفه لما تبقى عايزه حاجه اووى وتلاقيها ف غمضه عين راحت منك ..

وتبدأى تظبطى نفسك على الوضع الجديد وبعد ما خلاص تأقلمتى تلاقيها حصلت الى قبلها ..

بعد ما تشحنى نفسك ده انا هعمل واسوى ..تلاقى انك كنتى بتعومى ضد التيار ..

تحسى انك اصغر من انك تختارى حياتك..

قطر وماشى ف سكه حديد ..لا عارف هو رايح فين ولا حتى كان جاى منين..!!

جايز ساعتها مبيبقاش قدامك غير انك متعلقيش نفسك بحاجه ..

تبعدى عن الحاجات الى بتحبيها ..مع انك لسه بتحبيها ..

جايز عشان عارفه انك هتزعلى اكتر لوصحيتى لقتيها راحت منك..

بتقررى انتى بنفسك تسبيها جايز بيبقى احساسها صعب ..

بس مش اصعب من انها تضيع منك فجأه..

والغريب انك لما بتبعيها تلاقيها جتلك ..

والاغرب انها لما بتجيلك مبتحسيش الفرحه الى كنتى متخيلاها ..

لانها ببساطه ف عقلك الباطن ..مبقتش تفرق معاكى ..

جايز السنه الى فاتت كنت همووووووووووت واطلع نضيف

ولما عرفت انى شايله ..كنت شبه مقرره جوايا انى ادبلر الترم التانى بمزاجى ..

لا ذاكرت شيت ..ولا حرقت دمى ف عملى ..

والفانيل استهبلت عادى زى كل ترم ..وجبت جيد..!!

بس اكتشفت انى مفرحتش بالنتجه.. من جوايا كان عادى مش فارقه..

مع ان تقريبا كل الى حوليا كانوا مش مصدقين ..

حتى الدكتور الى بتجيبهالى كل ترم كانت طايره م الفرح..

جايز يكون الترم ده الامل الى ناوى يحرق دمى تانى كالمعتاد بعد ما كنت بعت القضيه..

وجايز يكون الامل الى يخلي عندى استعداد اذاكر بقى الترم ده..

الستة بتوع صيدلة

شخص 1: هما الستة بتوع صيدلة راحو فين ؟!

الستة بتوع صيدلة : .....................

شخص 1 : هما مبقوش اصحاب ولا ايه ؟!!!

الستة بتوع صيدلة : -_-

شخص 2 : دا احنا بنشوفهم دلوقتى مش مع بعض علطول .... ؟ كل واحدة لوحدها

الستة بتوع صيدلة :ضحكة شريرة

صوت 3 : لا انا لسة شايفهم امبارح مع بعض بس شكلهم كان مختلف

صوت 4 : انا سمعت ان فيه واحدة حولت من الكلية

الستة بتوع صيدلة : .......

صوت 5 :لالا دا فى واحدة دبلرت عشان كدة مبقوش مع بعض

الستة بتوع صيدلة : جررررررررررررررررر

صوت 1 : انا متأكد ان فى حاجة غريبة

صوت 4 : هما مبيردوش علينا ليه

صوت 2 : انتوا يا جماعة ياللى هنااااااا

صوت 3 : ايه دا افتحوا التلفزيون بسرعة التلفزيون جايب الستة بتوع صيدلة

___________

قام مسئول هام بالدولة بنفى الشائعات التى تقال هذه الفترة حول الستة بتوع صيدلة

و أكد انهم بخير ولم يتم خطف اى فرد فى العصابة

احم قصدى بالفريق

و لكنهم يرفضون الادلاء بأى تصريحات حولهم الا بعد انتهاء فترة الحداد اقصد الامتحانات

ولكن مصادرنا الخاصة اخبرتنا

ان العضوة **** من الفريق تلبس ما يسمى بالدبلة

و يبقى السؤال هل الدبلة فى اليمين ام فى الشمال !!

اموواااه

____________________________________

الستة بتوع صيدلة

except

every one can't keep a word..
a simple word
so
don't wait "except" ...am srry..not any more

حبه انوار ماشيين فى الضلمة بيتسحبوا

شافوا الشياطين اللى بيسرقوا

قامت المعركه بين ضلمة و نور

بان المستور

آدى الانوار و آدى الشياطين

مين فيهم ميين
اللى هيغلبوا
.........................................
حته من تتر مسلسل عجبتنى اوى قلت اكتبهالكم

ممكن نتعرف, و نبقى أصحاب ؟؟

إسمحولي أتشعبط معاكم شوية عليكم كده في مشوار صغير بالمركب. و بطلب من الستة و القراء إنهم يسامحوني على تطفلي بالشكل ده بس انا كان نفسي أقول حاجة و قررت أعملها مفاجأة و أقولها هنا, بعد إذن الجميع طبعا.

إيه؟؟ أنا مين أصلا؟!!, اه... معلش أنا أحمد نجيب. أخو سخسخوتي -بكل فخر-. خلاص؟؟ ممكن أتكلم بقى؟؟ شكرا.

إمبارح و أنا قاعد على البوابة (كنت كنجي بوابة) مش عارف إيه اللي فرقعها في دماغي إني أبص على البلوج بتاع مركب ورق في البحر, طلعت كده في دماغي من النو وير. أنا عارف إن سارة أختي تبقى أحد الستة متمركبي البلوج, بس عمري ما فتحته قبل كده. مع ان البلوج ابتدى رحلته من منتصف سنة 2007.

قصره فتحت البلوج نزلته عندي على الجهاز (شكرا لنوكيا و خدمات الـ 3G) و قعدت أتتبع رحلة المركب من أولها. حقيقي بلوج في قمة خفة الدم ده غير إنه بيظهر بشدة إن المجموعة دي عندها موهبة كتابة هايلة (صراحة مكونتش أتخيل إن سارة عندها الموهبة دي).

الأهم من كدة إني إكتشفت إني معرفش حاجة عن سارة أختي... و بجد إتصدمت و زعلت جدا جدا لما إكتشفت برضه إني نادر جدا ما بقعد اخد و أدي معاها في الكلام, اتواصل مع أختي العزيزة.

صحيح إني فكرت في الموضوع ده قبل كده كذا مرة, ويمكن حاولت كام مرة كدة أروح افتح معاها سِكّة كلام, خط حواري علشان أتواصل معاها, بس عمري ما أصريت أو كان عندي الـ commitment اللازم علشان فعلا أقدر أصل لأن تصبح سارة أختي سارة صاحبتي.

ف من مكاني هذا –دشمة بوابة الكتيبة- إسمحيلي يا سوسو أعتذر لك, و أوعدك إني ح أحاول تاني -و بشدة لحد ما أنجح- إني أكون أحمد صاحبك و صديقك... بجانب كوني على الأقل بيولوجيا أحمد أخوكي الذي أكونه الان.

و بناءاً عليه, إسمحيلي أطلب منك... لأ إستني لما أنزل على ركبتي كدة و أضم لك كفاي في رجاء... أيوة كدة, إسمحيلي أطلب منك: ممكن نتعرف, و نبقى أصحاب ؟؟

أحمد نجيب
دشمة بوابة الكتيبة
2008/11/18

غموض..قصه قصيرة

أراه كل يوم من شرفتى..نفس الموعد..يسير بخطواته المتمهله ..اراها رزينه هى خطواته..يعبر الطريق دون ان يكلف نفسه بالنظر للسيارات المندفعه من حوله ..حتى لتكاد تدهسه..ملابسه غير المتناسقه الداله على عدم اهتمام برأى الاخرين به..سيجارته الراقيه و التى يجذب دخانها ببطء شديييد يتلائم مع رزانته.. ثم ينزل يده الى جانبه ببطء و هدوء يساعد خطواته البطيئه بأيصال ذلك الشعور بزهده فى الوقت و الحياه الى فكرى..و يزيد على ذلك نظرته غير المتنبهة لما حوله و التى تؤكد ازدحام عقله بأفكار اراد ان يصفيها بتلك الرحله الهادئه من السير اللا هادف..و يختفى فى الافق لمده ساعتين ثم ارى أيابه..لا يختلف عن ذهابه سوى فى اتجاه السير..كم شغل تفكيرى بتساؤلات عدة عن ماهيته؟؟جذبنى بغموضه ..ببطئ خطواته..بلا مبالاته .. بتصفيته لافكاره..من هو!!..
حتى فى يوم ..و انا انزل من سيارتى متسرعه و اغلق بابها ..اذا بظهرى يصطدم بجسد آخر..وقبل ان ادير نظرى لاعتذر.. اذا بيد تتحسسنى بوقاحة فانتفضت مبتعده و قبل ان ينطلق لسانى..اتسعت عيناى..انه هو..او ليس هو..ما ذلك الانتفاخ الاسود تحت عينيه.. تلك التى تعجبت من نظراتها غير المتنبهة.. ملابسه الداله عن ترففعه عن تفاهات الاخرين وجدتها مجرد ملابس ممزقه..رائحته الكريهة افهمتنى غرابه سيجارته..

و تبدل ذلك السؤال فى عقلى عن من هو الى ماهو..ثم اختفى الاخير ليحل محله صرخة صدمه فاستهجان..انه مدمن..فقط مدمن ..تلف عقله و حلت محله شهوته..شهوة حيوان يحاول ان يثبت انه مازال انسان